اشتهرت قصة الفنان السوري “جهاد عبده” الذي لجأ إلى الولايات المتحدة الأمريكية في بداية الثورة السورية هرباً من قمع النظام السوري الذي يحاول أن يستخدم الفن لمصالحه السياسية، حيث بدأ عبده بالعمل في “إيصال البيتزا” في بداية رحلته، قبل أن يصل إلى هوليود.
الفنان “عدنان أبو الشامات” الذي يقيم في دبي والمعروف بمواقفه الموالية للنظام السوري كتب قبل أيام منشوراً على صفحته الشخصية يسخر فيه من الفنان “جهاد عبده” الذي لمع نجمه في هوليود قائلاً: “لما سمعت بقصة زميلنا الممثل Jay Abdo وكيف صار ممثل عالمي بعد ما اشتغل بتوصيل البيتزا، قلت لحالي بلكي إذا قلدته بينوبنا من الطيب نصيب، بس ما عرفت بعد كم توصيله هوي وصل”.
وأضاف أبو الشامات: “وإذا نقشت معي رح سمي حالي Eddy Schmidt، على كلٍ إذا صار معي شي جديد أنتو أول ناس رح خبرهم، ادعوا لي”.
لكن سرعان ما ردّ عليه الفنان السوري “جهاد عبده” حيث كتب على صفحته الشخصية في موقع “فيسبوك”: “صديقي الغالي عدنان أبو الشامات، شكرًا جزيلا على البوست، خلاني استرجع ذكريات عشناها سوى وتذكرت سهراتنا العائلية اللي جمعتنا، وحديثنا لما نكون مزعوجين من هالبلد اللي كلها محسوبيات، واللي الآدمي ما له مكان فيها، تذكرت لما تقلي يا جوج بالنمسا الحياة غير”.
وأضاف عبده: “بدي خبرك أني فعلا اكتشفت متل ما قلتلي: الحياة برا غير، وأنا لسا عم وزع بيتزا الحمد الله، ومبسوط إني أخيراً حققت شغلتين بحياتي، وأتمنى كل إنسان يحققهن… اكتشفت إنّو الشغل اللي علمونا إنه عيب هو شرف الإنسان، تعلمت أني فيني وزع بيتزا وما استسلم، واشتغل بالتمثيل بنفس الوقت”.
وتابع عبده: “تعلمت إنّي افتخر بأي شغل بقوم فيه، تعلمت أن الإنسان بيقدر يحافظ على كرامته وما يحط رقبته تحت البسطار، وعلى قد ما بكون مبسوط وأنا عم وقف جنب نجوم كبار بهوليود؛ على قد ما بكون طاير عقلي إني عم صير أسرع وعم لحق وزع بيتزا لعدد أكبر”.
واختتم عبده موجهاً لأبو الشامات رسالة: “أتمنى يا صديقي عدنان ما تستسلم وتتعلم من توزيع البيتزا اللي أنا عم أتعلَّمه”.
يشار إلى أن الفنان السوري “جهاد عبده” وصل في بداية الثورة إلى الولايات المتحدة الأمريكية وبدأ العمل في توصيل البيتزا، وهو ما افتخر به أكثر من مرة، قبل أن يصبح من نجوم هوليود السينمائيين، وهو ما تناوله “عدنان أبو الشامات” من جانب ساخر.
